చావు కబురు

కంటి రెప్పల చూరు క్రింద

వేలాడుతున్న జ్ఞాపకాలను

ఎలా తుడిచేయగలం

గోకుల్ చాటో, లుంబినినో

మక్కా మసీదో

రక్తం పారిన యేరుల జాడ

ఇంకా తడారలేదు

నగరం నెత్తురోడ్డుతోంది

భాగ్యనగరం కాదిది

భాధల నగరం

ఏ అపరాత్రో అర్థరాత్రో

చావు కబురు చల్లగా వస్తుంది

స్క్రోలింగులనిండా అదే

రక్తపు మరకలతో

మాంసపు ముద్దలుగా

మానవత్వం

ఏ పగ ఉందో ఏమో

ముష్కరుల పంజాకు

అభం శుభం ఎరుగని

వారు బలవుతుంటే

మనం సాధించింది

శూన్యమనిపిస్తోంది

రండి శాంతి కాముకుల్లారా

నిరసిద్దాం

నినదిద్దాం

గొంతులు సవరించుకొని

ఉగ్రవాదంపై ఉక్కుపాదం మోపుదాం

భారతావనిపై శాంతిని పరిరిక్షించుదాం..    22.2.13