ప్రేమ సందేశం

పరవశమంటావో.. పరాధీనమంటావో

ఏదైతేనేం నీ ఆలోచనలే ఊపిరవుతున్నాయి

నిటూర్పులంటావో .. నిరాశలంటావో

ఏమైతేనేం నీ జ్ఞాపకాలే పరిమళిస్తున్నాయి

జీవన వనంలో తోడుగా నీ ఉంటావని

నీ తలపులతో పరిభ్రమిస్తూంటే

కలలమేడలు కూలుతున్న చప్పుడు విని

కాలం వెక్కిరిస్తూ వెళ్ళిపోతోంది

ఇంకా ఎంత కాలం చెప్పు

మేఘ సందేశం పంపుదామంటే

నీలాకాశంలో మేఘాలేవి కనబడటం లేదు

ప్రేమలేఖ పావురాయితో పంపుదామనుకుంటే

పావురాల రెక్కలు ఎవరో కత్తిరించేసినట్టున్నారు

ఈ దూరాలు దగ్గరవ్వాలంటే

నీ మౌనం చిరునవ్వై ఘనీభవించాలి..

నీ పలకరింపు తొలకరిగా కురసి

నా ఎదలోగిలి పులకరింపుతో పొంగిపోవాలి

                      //కరణం లుగేంద్ర పిళ్ళై  //

                                  10-10-12